Azərbaycan saxlanılan rusiyalılarla görüşə razılıq verib
Rusiyalı diplomatların Azərbaycanda saxlanılan Rusiya vətəndaşları ilə görüşməsinə razılıq verilib. Bu barədə Rusiya Xarici İşlər Nazirliyinin (XİN) sözçüsü Mariya Zaxarova jurnalistlərə açıqlamasında deyib.
"Azərbaycanda saxlanılan 13 rusiyalı vətəndaşa konsulluq işçilərinin baş çəkməsinə razılıq verilib", - o bildirib.
'Amnesty International': Azərbaycanda və Rusiyada polis əməliyyatlarında hüquq pozuntuları araşdırılmalıdır
Rusiyada Azərbaycan diasporunun üzvlərinin, Azərbaycanda isə həmin ölkə vətəndaşlarının kütləvi saxlanması və işgəncəyə məruz qalması ilə bağlı xəbərlərə münasibətdə "Amnesty International"ın Şərqi Avropa və Mərkəzi Asiya üzrə direktoru Mari Strazers deyib ki, hər iki ölkədə polis əməliyyatları zamanı hüquq pozuntuları araşdırılmalıdır: "Onların hakimiyyətləri insan ləyaqətinə tamamilə etinasız yanaşdıqlarını və insan hüquqları üzrə öhdəliklərinə açıq-aşkar hörmət etmədiklərini göstəriblər. İşgəncə, digər pis rəftar beynəlxalq hüquqla qəti şəkildə qadağandır və bunun heç bir əsaslandırması ola bilməz. Baş verənlər, görünür, sadəcə etnik mənsubiyyətə və vətəndaşlığa əsaslanan qarşılıqlı cavab xarakterli polis əməliyyatlarıdır".
O vurğulayıb ki, saxlanılan şəxslərin hüquqları və hüquqi prosedurlara hörmət dövlətlər arasındakı siyasi gərginliklərdən üstün olmalıdır.
"Hakimiyyətlər qanunsuz qətllər, işgəncə və digər pis rəftarla bağlı iddiaları dərhal, hərtərəfli, müstəqil, qərəzsiz şəkildə araşdırmalı, məsuliyyət daşıyanlar ədalət qarşısına çıxarılmalıdır", - "Amnesty International"ın rəsmisi əlavə edib.
Rusiya XİN-dən tövsiyə
Rusiya Xarici İşlər Nazirliyi (XİN) Rusiya vətəndaşlarına tövsiyə edir ki, mövcud şəraitdə Azərbaycana səfər edib-etməmək barədə qərar verərkən bu ölkədəki vəziyyəti diqqətlə nəzərdən keçirsinlər.
+++
Rusiyanın Azərbaycandakı səfirliyi Azərbaycanda Rusiya vətəndaşlarına fiziki zorakılıq göstərildiyi haqda bəyanat yayıb. İyulun 2-də yayımlanan bəyanatda deyilir ki, səfirlik son sutka ərzində Azərbaycanda olan, habelə turizm məqsədilə səfər edən Rusiya vətəndaşlarından çoxsaylı müraciətlər alıb.
"Müraciətçilərin sözlərinə görə, yaşadıqları ünvanlara mülkigeyimli şəxslər (bəzi hallarda özlərini polis əməkdaşı kimi təqdim ediblər) gəlib və onların ölkədə qalma məqsədini sorğu-sual edərək sənədlərini yoxlayıblar. Bəziləri deyir ki, onlara və ailə üzvlərinə fiziki zorakılıq tətbiq olunub", - bəyanatda vurğulanır.